Fjalor i Gjuhës Shqipe

Fjalori i fundit(2006) i publikuar nga ASHSH(Instituti i Gjuhësisë dhe Letërsisë) - rreth 48.000 fjalë

Kuptimi i fjalës pushim
pushim:

pushím,-i m. sh. -e(t) 1. veprimi dhe gjendja sipas foljes: pushimi zjarrit (i luftimeve); pushimi nga puna (nga detyra); pushim zemre; punon pa pushim punon pa ndërprerje, punon vazhdimisht. 2. koha gjatë së cilës njeriu pushon; koha e lirë pas punës; ditë e caktuar ose leje për të mos vajtur në punë, në shkollë etj.; kryes. sh. periudhë e caktuar gjatë vitit kur një punonjës ka të drejtë të pushojë ose kur nxënësit e kanë mbyllur vitin shkollor: pushim javor; pushimi i drekës; pushim nga mjeku; është me pushime; ku do t’i kalosh pushimet? 3. muz. pauzë e zakonshme midis notave; shenja e kësaj pauze: pushim i plotë (katër të katërta).

Në literaturë:

...nga mosha. Porsa ka marrë vesh që erdhëm ne, paska vënë medaljet, paska ngjeshur koburen dhe ka dalë përjashta. Tani këtë e bën përditë. - Madje, edhe punëtorët shqiptarë i vështron me përbuzie - tha prifti. - Pardje, specialisti e pyeti për diçka dhe ai nuk iu përgjigj. - Është plak fanatik. Siç duket, edhe ata i duken si aleatët tanë. - E di? - vazhdoi gjenerali, me zë të ulët. - Njeriu duhet të parashikojë çdo gjë. Unë u trembem torollakëve të tillë Ja, i shkrepet, nxjerr koburen e të qëllon mu në mes të ditës! - Çdo gjë mund të ndodhë, - tha prifti. - Nga një gjysmë i lënë si...

Ismail Kadare, "Gjenerali i Ushtrisë së Vdekur"
Në literaturë:

...ishte shumë serioz dhe i sjellshëm. Prifti fliste pak. Gjenerali dha të kuptonte se ai ishte kryesori, ndonëse prifti fliste më pak. Ai foli për traditat e bukura që kishte krijuar njerëzimi në lidhje me varrimin e ushtarëve. Përmendi grekët e trojanët, që varrosnin njerëzit me aq madhështi në pushimet midis luftërave. Ai kishte shumë besim në misionin e tij. Do ta kryente patjetër këtë mision të rëndë dhe të shenjtë. Mijëra nëna prisnin bijtë e tyre. Ato kishin njëzet e ca vjet që prisnin. Është e vërtetë se kjo pritje ndryshonte pak nga ajo pritja tjetër, kur ato shpresonin t'u ktheheshin...

Ismail Kadare, "Gjenerali i Ushtrise se Vdekur"

...lëviznin duart e të thoshin diçka, po s'bënë gjë tjetër, veçse mbyllën çantat e hapura. Bisha e ujit ishte mposhtur. Pas një jave, nga zoti i rrugëve e i urave u bë blerja e copës së udhës, që i përkiste zotit tonë. Ishin dy të dërguar të tjerë, të cilët kishin tre muaj e ca që shtegtonin pa pushim nëpër principata, kontera e pashallëqe, duke blerë udhën e madhe perëndimore, që dikur quhej Via Egnatia e që tani i thonë Udha e Ballkanit, sipas emrit me të cilin turqit kane pagëzuar kohët e fundit krejt gadishullin e që vjen prej fjalës "bjeshkë". Më fort se dëshira e osmanëve për të mbështjelle...

Ismail Kadare, "Ura me Tri Harqe"

...tradicionale, pa përdorur gozhda metalike. Ndër këto orendi mund të përmenden fronat e gjatë e të thjeshtë pa mbështetëse, tryezat masive me dhoga të trasha, govata e magje, shtretër etj.. Për t’u çlodhur, malësori mund të ulej thjesht mbi një postiqe pranë zjarrit, kurse banori i fushës, për një pushim të shkurtër ulej gjysmë i shtrirë mbi një rrogoz, shtruar në një qoshe të freskët brenda shtëpisë ose në hije në oborr. Sidoqoftë, përsa u përket pajisjeve të fjetjes, në dokumente, sidomos në testamente, përmenden shtretërit prej druri, e në disa raste ata shihen edhe në skena ikonash. Krerët...

Akademia Shqiptare e Shkencave, "Historia e Popullit Shqiptar"
Të ngjashme:
pushem:

púsh/em vetv., -a (u), -ur 1. më del pushi në faqe. 2. bëhem me push: u pusha nga pambuku.

fushim:

fushím,-i m. sh. -e(t) 1. veprimi sipas foljes. 2. usht. qëndrim i përkohshëm i trupave në një vend të hapur, larg kazermës për stërvitje etj.

gushim:

gushím,-i m. veprimi sipas foljes.

peshim:

peshím,-i m. sh. -e(t) veprimi sipas foljeve.

pushtim:

pushtím,-i m. sh. -e(t) 1. veprimi sipas foljeve. 2. koha gjatë së cilës një vend qëndron i pushtuar: para (pas, gjatë) pushtimit osman.